بالنقر هنا

[أنـس العـنزي]

السلام عليكم ورحمة الله وبركاته


عسى كل من في بيت العرب وزواره بالف صحه وسلامه
واتمنى من الجميع يعذروني على طول الغياب

//
//
//

الف ٍ أولف يازماني بديعه = بدع القوافي دايم ٍ لي طويعه
بذر المعاني من زرعها حصدها = يامرني الطاروق يمه واطيعه
والبا بريت اقلام فكري وسجيت = معها عن انظار المخاليق عديت
سجلتها وبدفتري من رغدها = يلقى بها قلب الهواوي ربيعه
والتا توالت صافيات المناظر = هليتهن في نظم الابيات حاظر
يقولها اللي بالشعر ماوأدها = لين كبرت عنده وكانت رضيعه
والثا ثمين القاف جزله وغاليه = اشريه واعانق شواهق عواليه
كل البيوت مثبتين ٍ عمدها = ومركزين اطنابها بالطليعه
والجيم جاني هاجسي تالي الليل = والضيقه اللي مع همومي مقابيل
ياصدري اللي للصعايب بلدها = العبد يرجي والولي هو سميعه
والحا حشمت اذان وعيون وعقول = ولساقطات الحرف ماكنت مسؤول
كان الكثير معريين ٍ جسدها = فانا رفعته للعلوم الرفيعه
والخا خفايا خاطري والتفاكير = مااعلنتهن ياكود حلو التصاوير
ياصبر روحي ياعناها وجلدها = على الخفايا الموجعه والمريعه
والدا دعاني من عنا الوقت داعي = وامسيت ادور مع وجودي وداعي
وسط الحياه اللي قليل ٍ عددها = اشقتني سنين الجفا والقطيعه
والذا ذرايه عن سنا واهج الشمس = وذراعي اللي يطمسون الكدر طمس
ارداهم اللي حجته لا عقدها = هانت ثقيلات الحمول الوديعه
والرا رجيت الخالق النافع الضار = انه يقديني هل الطيب والكار
والمرجله والجاحد اللي جحدها = ماهي غريبه لو كلامه يبيعه
والزا زهمت القاف لبى وسطّر = دامه حظر والهزل عنّه تشطّر
يامظهرين افكاركم في شهدها = والحقد وسط قلوبكم له شريعه
والسين سارت بي ظروف الليالي = واسلي الخاطر ولاهو بسالي
ذيك الجفول الفاتنه ياسعدها = عين ٍ تشوف عيونها بالطبيعه
والشين شوقي ياغرام المعنا = يحرق عروقي ذا خفوقي يونا
نار الظلوع اللي تزايد وقدها = من غيبتك ماعادني بـأستطيعه
والصا صواديف الليالي لقانا = عطشا ومن نبع المحبه سقانا
وقت ٍ مضى ماعاد لي من بعدها = وجدي عليها والعيون الوسيعه
والضاد ضافية الجدايل مناتي = تجمع شتاتي لا تبعثر شتاتي
عذبه يعذبني تزايد عندها = في وصفها مااقول غير البريعه
والطا طبوع القاف مثل السحايب = لا حدها الغربي يهب الهبايب
وبروقها لاحت وجاوب رعدها = صكت مزون الحرف ماهي صنيعه
والظا ظروفي لو تجيلي على الكيف = مالحظة ٍ فارقتها يالمواليف
رافق قديم احزان قلبي جددها = وتسابقت خطوات حزني سريعه
والعين عيني عايفة لذة الشوف = الا على لحضاتها كلي شغوف
ربي خلقها وابدع اللي وجدها = حورية العينين بارض ٍ بديعه
والغين غابت شمسها ما اشرقت لي = وطروقها مادندنت ماطرقت لي
واشواقي اللي بعدها بي رجدها = رجد الصخر من فوق قمه فضيعه
والفا فتحت ابواب صبري لصدري = عسى الليالي تلتفت لي وتدري
واحلامنا ياعل يصدق وعدها = وعلى وعود الروح نفسي جزيعه
والقاف قسمي بالمقادير بألقاه = إن كان لي فرقاه والا بلقياه
وان كان لي لقياه زايل نكدها = وان كان لي فرقاه حالي هليعه
والكاف كافي في عيوني غلاها = والنايفه ماحد ٍ تطاول معاها
كل العذارى تحت تحريك يدها = من هي تماريها تمسي تبيعه
واللام لو لام العذول بغرامي = ماهمني عذله يشد اهتمامي
موارد العشاق لوّه وردها = مالام خفقات القلوب الوليعه
والميم مرت بي غرابيل دنياي = رجواي ربي عالم ادناي واقصاي
اقصى جروح القلب نبضه سندها = والروح عند ادناه ماهي خضيعه
والنون ناخذ، نعطي، نحن، نشتاق = نهوى، نود، نحب، نعشق وننساق
واللي خفا أمر منها وأدهى = وادهى من اني بالقوافي اشيعه
والها هقيت وكم لقيت الهقاوي = وياما رويت من المناوي مناوي
خاويت سهلات السنين وكبدها = حلو الزمان ابقيه والمر رجيعه
والواو ولت ذكرياتي مع الريح = يوم العواصف خلفت بي تجاريح
يوم الرخا والضيق بين ولدها = حصن ٍ على وجه المردى منيعه
واليا يطير الطير ويعود راجع = على الغصن هيّض كثير المواجع
مثلي ينوح الحان صوته مهدها = وعلى غصون القاف ورقى وجيعه

[مشاري بن جدلان]

الله اكبر عليك

جبت الدرر الثمين

ارويتنا شعرا يا انس

كل الشكر

[أنـس العـنزي]

ياهلا والله يابن جدلان
الله يعطيك العافية
يكفيني تواجدك

[محمد السالم]

جميل أيها الجميل

جميلة هذه الالفية

قد كان هذا اللون فن من فنون الأولين إلا ان المتأخرين لا أعلم لماذا أبتعد الكثير عنه

ربما لصعوبة كتابته
فلم يبقى أحد يكتبه إلا من يمتلكون القدرة مثلك

لك التحية

[بنت كنعان]

شاعرنا المبدع الراقي

مررنا بروضكم الغناء وسرنا الهوينا في ظل حروف شاعر يجيد العزف على اوتار الوجدان فلحرفك اريج يشد من يمر بقربه
كم اعجبني استخدامك للفكرة ( حروف الضاد) في هذا الاسلوب فقد اخرجتها بثوب قشيب وجمال لغوي

فيض حرف لا ينضب ولا فض فوك ايها الكريم

تقبل مروري المتواضع المتطفل على عالم حرفك الشعري الغني

جُل التقدير والاحترام لشخصكم الكريم
بنت كنعان

[أنـس العـنزي]

الأخ الشآعر/ محمد السالم كل التحايا لك
تواجدك وثناءك على ماكتبت فهو في مقام الوسام على صدري
فكل الشكر والتقدير..

[أنـس العـنزي]

أختي العزيزة بنت كنعان
مررتي أهلا ً على هذه الصفحة التي زخرفتها حروفك.
لمرورك الشيء الكثير ولثناؤك كل الود والتقدير
ولك ِ مني خآلص الود

[خالد العيسى]

صح لسانك شاعرنا المتألق ك أنس العنزي

درر ثمينة وجواهر غالية نبضت بها حروفك بهذا النظم المتدفق معنى وعذوبة

من ألفها إلى يائها ..

لك تحياتي وتقديري